“Condong Mato Ka Nan Rancak, Condong Salera Ka Nan Perai”

Oleh : Efri Yunaidi

“Condong mato ka nan rancak, condong salera ka nan lamak” baitu pepatah urang tuo kito dahulunyo. Pepatah nan manunjuakkan kalau orang-orang pada maso itu iyo bana manjago apo nan dicaliaknyo dan apo nan dimakannya. Mungkin kito sabuik sajo manjago kulaitas apo nan dicaliak jo apo nan dimakannyo. Manuruik nan tuo, rancak disiko iyo bamakna pulo “rancak” manuruik adat, rancak manuruik syara’ itu nan ka kito caliak. Lamak juo bak kian, lamak rasonyo, lamak mandapekannyo, lamak dek awak ka tuju dek urang.

Tapi nan bak kini, pepatah nan tun lah baraliah bunyi saketek “ condong mato ka nan rancak, condong salero ka nan perai “. Baitu pulo bunyinyo dek urang mudo kini. Saketek sajo nan barubahnyo, pun nan bak kian ado nan iyo bana nan pokok nan baraliah. Yaitunyo condong paruik lah ka nan perai.

Orientasi urang kini yo lah ka nan perai, ka sesuatu nan indak banyak maabihkan tanago, ka nan indak banyak membutuhkan usaho untuak mandapekkannyo. Ba kecek urang juo “ Budaya Instan”.nak capek se, nak nan mudah se, nak sanang se.

Kalau kito mancubo mancaliak disikolah-sikolah, di tampek nan mudo bakumpua tantu indak lah susah dek kito mandapekkan apo nan dikecekkan “budaya instan” tut doh. koq disikolah namonyo, nilai iyo nak tinggi ko baraja iyo nak indak,akianyo ambiak jalan “instan”. Alam takambang jadi guru jimaik takambang beranglah guru.

Koq di masyarakaik namonyo, koq iduik iyo nak sanang, tapi koq kabakarajo koq dapek iyo jan lai.koq awak iyo nak disanjuang urang, tapi ba budi ka urang, ba jaso ka urang yo nak indak.

Mancaliak kito ka urang nan lah gadang namonyo, kito iyo taragak pulo nan bak kian. Koq karajonyo rancak, koq ka bajalan ado oto, koq ka lalok ado rumah. Tapi kito lupo mancaliak baa karajo urang nin dahulunyo. Kito nak iyo pulo nan saruman itu, tapi koq ka bakarajo koq ka bausaho indak kito nan saruman tut doh. nan sanang se lah dek awak.

Antah baa lah ajaknyo, mungkin ba tali pulo jo prinsip ekonomi kapitalih nan diajakan disikolah-sikolah agaknyo “ dengan modal yang sekecil-kecilnya untuk mendapatkan keuntungan yang sebesar-besarnya” antahlah!??*

Batanyo kito ka angku imam di musajik, satantangan iko. Ciek sajo pasan baliaunyo, dibacoannyo kalam ilahi

“ …sesungguhnya Allah tidak merubah nasib suatu kaum sebelum mereka mengubah diri mereka sendiri…” QS; Ar-Ra’d 11.

Baitu kecek angku imam, ibaraik roda padati,takadang diateh takadang dbawah. Tapi nan paralu kito ambiak pelajaran adolah roda nan di bawah tadi indak ka tibonyo di ateh kalau padati indak bajalan. Kito ka barado dibawah jo taruihnyo kalau kito indak bajalan.ndak mungkin dari bawah jo caro “instan” ka dapek di ateh.

Koq nak kayo iyo kuek lah mancari, koq nak tinggi nilai sikolah yo rajinlah baraja. Bak kato urang juo; Barakik-rakik ka hulu baranang ka tapian kamudiak dihari sanjo, basakik-sakik dahulu basanang-sanang ka mudian, barugi mangko balabo.

Mungkin baitu lah, koq di rantang namuahnyo panjang, koq dikumpa namuahnyo singkek, singkek sakiro kapaguno. Satantangan pasan angku imam tadi kito ambiak selah pelajaran dari nan dibacoan dek baliau tadi. Jan lah kito ba angan-angan ka “perai” sajo sadonyo, ka “instan” sajo caro untuak roda padati tibo di ateh

*kecek pak etek; prinsip ekonomi apolo tu?

“ kalau itu prinsip wak ang yuang, yo lah samo pulo ang jo sumanto tu, nan makan urang tuha. Dima lo wak ang ka dapek untuang gadang kalau usaho ang saketek? lah ka pasti juo ang mengorbankan urang lain tu nyo” baitu kecek pak etek kutiko dibacoan prinsip ekonomi ka wee

Padang, 13 Januari 2011

Efri Yunaidi

( Anak Pisang Rang Koto )